Работниците не можат да живеат од плати што не ги покриваат ниту основните трошоци!

14 октомври, 2026
Владата на Мицкоски мора да престане да ги игнорира реалните проблеми на работниците и нивните семејства. Во Македонија денес, сè повеќе граѓани работат, а сè потешко живеат. Работниците секојдневно се соочуваат со раст на трошоците за храна, сметки, превоз и гориво, додека нивните плати не успеваат да го следат поскапувањето на животот.
Според најновите податоци на Сојузот на синдикатите на Македонија, синдикалната минимална кошница за септември 2026 година достигна 69.432 денари. Две минимални плати, кои заедно изнесуваат околу 52.000 денари, не се доволни за покривање на основните месечни потреби на едно четиричлено семејство. Недостигаат дури 17.432 денари месечно.
Овие бројки се реалноста со која се соочуваат илјадници семејства. Тоа се родители кои секојдневно одат на работа, а на крајот од месецот мораат да пресметуваат дали ќе имаат доволно пари за храна, сметки, облека и потребите на своите деца.
Наместо да понуди конкретни решенија за подобрување на животниот стандард, Владата предводена од Христијан Мицкоски не покажува подготвеност за суштинско зголемување на минималната плата. Работниците не бараат привилегии, туку достоинствена заработувачка од која ќе можат да живеат. Нивниот труд создава вредност и заслужува соодветно да биде платен.
Истовремено, високите цени на горивата дополнително го оптоваруваат семејниот буџет, а поскапувањето на основните производи и услугите го прави секојдневието сè потешко. Најпогодени се работниците со ниски примања, пензионерите, семејствата со повеќе деца и граѓаните кои веќе се на работ на сиромаштијата. За нив нема доволно конкретни, навремени и системски мерки за финансиска поддршка.
За НСДП, економската политика мора да се оценува според тоа како живеат граѓаните, а не само според владините соопштенија и економските показатели. Не може да се зборува за економски напредок кога луѓето што работат не можат да ги покријат ниту основните животни потреби.
Затоа, НСДП бара итно отворање на сериозен социјален дијалог со синдикатите и работодавачите, зголемување на минималната плата во согласност со реалните трошоци за живот, како и конкретен пакет економски мерки за помош на најранливите категории граѓани. Потребни се и мерки што ќе го ублажат ударот од високите цени на горивата и основните производи врз семејните буџети.
Државата мора да покаже одговорност кон оние што живеат од сопствениот труд. Не е прифатливо работникот да биде оставен сам да се справува со растечките цени, додека неговата плата останува недоволна за достоинствен живот.
НСДП се залага за социјална правда, достоинствена работа и плати што овозможуваат пристоен живот. Затоа што трудот мора да се почитува, а економијата мора да им служи на граѓаните.

НАШИ ПРИОРИТЕТИ

И трудот е капитал

Вработување

Енергетика

Земјоделство