8 август, 2026

Податокот дека оваа учебна година се запишани околу 4.900 првачиња помалку од претходната е поразителен и претставува сериозен аларм за државата.
Зад овие бројки стојат иселени семејства, празни училишни клупи и неизвесна иднина.
НСДП уште во 2013 година во Собранието го отвори прашањето за масовното иселување и предупреди дека, доколку државата не создаде услови за достоинствен живот, Македонија ќе се соочи со сериозна демографска криза. За жал, денес сведочиме дека тие предупредувања се остваруваат.
Младите нема да останат и нема да се одлучуваат да формираат семејства и да имаат деца ако живеат во несигурност. Без континуирано покачување на платите, без реално вреднување на трудот, без сигурни работни места и без крај на уцените со времени договори, не може да се очекува позитивен демографски пресврт.
Затоа, борбата против прекарната работа ќе биде еден од врвните приоритети на НСДП во наредниот период.
Наша цел е секој работник да има сигурно вработување, достоинствена плата и можност да го планира својот живот без страв и неизвесност.
Само држава во која младите имаат сигурност, перспектива и достоинствени услови за живот може да ја запре миграцијата и да создаде услови за повеќе деца, повеќе насмевки и повеќе исполнети училишни клупи.
НСДП останува доследна на својата определба – трудот да биде вреднуван, младите да останат дома, а Македонија да има иднина.





