Изјава за медиуми, доц.д-р Предраг Трпески, советник од НСДП во Совет на Град Скопје
Почитувани,
Денес Градоначалникот Трајановски до Советот на Град Скопје ја поднесе Годишната сметка за 2013 година. Од неа може точно да се види дека Градоначалникот Коце Трајановски и ВМРО-ДПМНЕ во 2013 година не го исполнија она што им го ветуваа на граѓаните и беа фокусирани на проекти кои се претежно од нивни интерес, а помалки од интерес на жителите на Скопје.
Може да се види дека буџетот за 2013 година беше проектиран во функција на локалните избори и манипулирање со македонските граѓани.
Дека Градоначалникот Коце Трајановски 2013 година ја заврши неуспешно покажуваат следниве факти:
Прво, многу ниска реализација на вкупните приходи од 74% и тоа во однос на претходно ребалансираниот буџет, кога приходите се намалија за 10%;
Второ, ниска реализација од 73% и на вкупните расходи;
Трето, целосно потфрлање на страната на капиталните расходи кои се реализираа со многу скромни 66% од планираното. Целосен неуспех.
Можеме да заклучиме дека таму каде што има реални инвестиции реализацијана е доста ниска, но затоа пак таму каде што се предвидени средства за подготвување и изведба на проекти, изградба на катни гаражи и сл., реализацијата е над 90%. Така на пример, изградбата на атмосфрески и фекални канализации во повеќе населени места во Скопје има реализација од 0%, изградба на комунална инфраструктура – реализација 35%, кај реконстрикцијата на булевари, улици, тротоари и надвозници реализацијата е ниска и е под 60%. Но, од друга страна, за изградба на проект за водоснабдување на Млениумскиот крст реализацијата е 91%, 90% реализација има и кај средствата предвидени за подготовување на проект Панорамско тркало, за што на крајот на декември се исплатени преку 30 милиони денари, а нешто сличен процент на реализација има и кај изведбата на катните гаражи.
Уште полоша слика се добива ако се анализира реализацијата според сектори. Па така, реализацијата на предвидените активности на секторот за меѓународна соработка е 50%, секторот за локален економки развој има реализација од 55%, а секторот за Заштита на животната средина реализација од 56% и тоа во периодот кога загадувањето претставува еден од најголемите проблеми за скопјани.
Не смее а да не се спомене фактот дека Градот Скопје во 2013 година има доспеани а неизмирени обврски во износ од 230 милиони денари. Тоа се обврски во најголем дел спрема градежните фирми, кои доспеале, а Градот се уште ги нема исплатено. Кои се мотивите за тоа можеме само да претпоставуваме.
Сето ова покажува дека 2013 година на инвестициски план е промашена година за г-динот Трајановски и за ВМРО ДПМНЕ и уште една изгубена година за граѓаните на Скопје.