По повод одбележувањето на 14 години од смртта на поранешниот Претседател на Република Македонија, Борис Трајковски, делегација на Град Скопје, денеска / 26.02.2018 година, вторник/, положи цвеќе на неговиот гроб во Алејата на Великаните на градските гробишта Бутел.
Делегацијата на Град Скопје, беше составена од Претседателката на Советот на Град Скопје, Љубица Јанчева, советникот на градоначалникот, Азиз Максутовиќ и членот во Советот на Град Скопје, Петар Шапе.
Со овој чин, делегацијата на Град Скопје, оддаде почит на Вториот Претседател на независна Република Македонија, кој на 26 февруари, 2004 година, во атарот на село Ротимље, во близина на Мостар, трагично го загуби својот живот, во авионска несреќа.
Цвеќе, на гробот на Борис Трајковски, положија и делегации од Владата на Република Македонија, од Кабинетот на Претседателот на Република Македонија, од Собранието на Република Македонија, од Министерството за култура, од АРМ, претставници на политички партии, претставници од дипломатскиот кор, претставници на образовни и научни институции, здруженија, како и голем број граѓани од нашава земја и од странство.
